Piše Danica Leštek:
V petek 28. lipnja pri Felleru se opet pila KAJkavica, of put z mladam stubičkam piscam Jožekam Čekoljam. Jožek je tak marni da kre toga kej študiera na zagrebačkamu Filozofskamu fakultetu i fletne diela v izdavačke hiže Mala zvona, napisal je več četiri knjige: Srna i mak u potrazi za izgubljenim mjesecom, Hahari na dnu mulja, Junaci i zmajevi u zalasku i Dječak pred žetvu. Kre toga sega još je pisal i v zajedničke knjigice U ritmu jeze – Ponor plesova. Bila nam je čast imeti takvuga gosta z terim se moreme štimati jer on je naš stubički dečec i đak naše stubičke škuole. Zmislil se on i toga kak je v škuolu išel i kak su vučitali pune vu samomu početku njegvuga pisanja pomogli. Jožek piše i pesme i prozu, piše za veliku i malu decu, piše na kajkavice i štokavice. Spominali sme se o semu koj je napisal, eli polaznike radionice je največ zanimala poezija. Jer kak se i šika, Jožek ima svojuga stila: male piše na kajkafskam, male na štokafskam. To je gli tak kak se i mi spominame: doma po domači, vane po gospuocki. Sreča je to za našuga jezika jer ga buju tak si čitali, i Zagorci i Slavonci i Dalmatinci.
Ova KAJkavica je dobila ime po jene rečenice z romana Hahari na dnu mulja: „Sedni na tepih i čitaj mi, dečec“. A naš Jožek je sel za stol i čital nam je i mi sme uživali, ufame se da ga bute čitali i uživali i vi!
To je bila naša zadnja radionica pred lete, a v jesen se pak vidime, buju nuove teme i nuovi gosti.
